Riba 1 Òktober 2018, Ofisina di Turismo a kumpli 29 aña.

Ofisina di Turismo di Kòrsou ta un fundashon ku ta kai bou di e Ministerio di Ekonomia. E fundashon aki ta wòrdu supsidiá dor di e ministerio pa asina e kumpli ku su funshonamentu diario.

Komo fundashon, Ofisina di Turismo no tin mag di hasi ganashi den ningun forma, pues Ofisina di Turismo no tin mag di bende produkto òf kobra pa un servisio.

Ofisina di Turismo ta un organisashon chikitu ku no mas di 45 trahadó, konsistiendo di 1 direktor, manager nan, koordinador/asistente nan, officer nan i partaimer nan. Aktualmente e organisashon no tin un direktor pero si e tin direktor interino. Bou di manager nan ta kai entre otro e koordinadó nan i tambe asistente nan, kual ta esnan ku ta yuda guia e “officers”. Officers ta tur trahadó nan ku no ta manager ni koordinadó/asistente.

E departamento di finansa ta atministrá i tur asuntu finansiero di henter Ofisina di Turismo. Tambe nan ta sòru pa hasi pago nan na stakeholder nan.

E departamento di rekurso humano ta sòru pa tur kos di trahadó nan. E departamento aki ta atendé ku tur asuntu di trahadó nan di Ofisina di Turismo, por ehèmpel salario, dia nan di fakansi, yuda e trahadó krese den su karera, yuda e trahadó nan ku tin problema personal i diferente kos mas.

E departamento di komunikashon tin un relashon hopi di aserka ku tur media manera entre otro korant, televishon, radio. E departamento aki ta sòru pa tur informashon i òf notisia yega na e diferente forma nan di media.

E departamento aki ta tene nos edifisio i e esfera paden i rònt di CTB na òrdu i na un manera ku trahadó nan por ta konfortabel. Tambe nan ta sòru pa tur fasilidat di den edifisio di CTB, por ehèmpel stul, mesa, diseño di e kantor nan, tambe tur materialnan di kantor etc.

Esaki ta e departamento ku ta sòru pa tur sifra di turismo, serka e departamento aki bo ta haña informashon di kuantu turista a bini Kòrsou, unda nan ta keda, kuantu turista a bini ku avion i of barku i asta kuantu sèn turista nan a gasta na momentu ku nan a bishita Kòrsou.

E departamento di merkadeo digital ta manehá CTB su website nan i tambe tur CTB su página sosial riba internèt, manera entre otro www.curacao.com, www.facebook.com/curacaotb.

Tambe e departamento ta pone tur informashon relevante di Kòrsou riba e website pa e turista i esnan interesá den Kòrsou. Esaki ta e forma digital pa merkadea Kòrsou. Konstantemente e manager ta update i pòst un algu bunita di Kòrsou i òf pone informashon nan balioso di nos isla pa atraé turista nan.

Un departamento di strategia ta responsabel pa e direkshon/strategia di e organisashon pa asina garantisá un promoshon maksimal tantu den eksterior komo lokal.

Den e departamento di merkadeo general Ofisina di Turismo tin 4 manager di área i tambe un konsehero di merkadeo. E manager nan di e 4 área nan ta:

Kada un manager di área ta sòru pa merkadeo den su área. E konsehero di merkadeo ta duna konseho na e manager nan di merkadeo abase di tendensia nan di merkadeo mundial.

Ofisina di Turismo ta konta tambe ku un “internal auditor” pa tur kos kana segun prosedura i regla. Tambe nos tin un konsehero legal ku ta sòru pa tur asuntu nan legal di CTB ta na òrdu; por ehèmpel na momentu ku CTB ke usa un kantika òf potrèt. CTB ta buska pa sa ken ta e artista òf e fotógrafo i via di e konsehero legal CTB ta manda pidi outorisashon pa usa e kantika òf potrèt.

Meta prinsipal di Ofisina di Turismo ta pa huntu krea un Dushi Kòrsou i pa promové Kòrsou den eksterior pa asina trese mas turista na Kòrsou. Tambe Ofisina di Turismo ta lucha pa Kòrsou bira un di e isla nan mas gusta den Karibe no solamente pa nos solo i laman, pero tambe pa medio di nos kultura úniko, nos Dushi hende nan i tambe nos monumento nan i nan historia. Un isla ku ta sòru pa su medio ambiente i tambe su seguridat.

Na Ofisina di Turismo bo ta haña tur informashon relashoná ku Turismo. Mayoria bes turista nan ta bini na Ofisina di Turismo pa haña informashon di Kòrsou i tambe tuma konseho di kua ta e lugá nan ku nan por bishita, dependiendo di e turista su interes. Serka Ofisina di Turismo bo ta haña entre otro: foyeto nan di atrakshon nan turístiko, restorant, tour nan, hotèl i otro akomodashon nan, mapa di Kòrsou, museo nan i hopi informashon mas.

Tambe un turista por bini na Ofisina di Turismo si e tin un reklamo. E reklamo por ta algu relashoná ku un eksperensia ménos agradabel òf tambe pa yuda drecha servisio di kualke atrakshon ku el a bishita òf akomodashon ku el a hospedá. Ofisina di Turismo na su turno ta tuma e keho òf reklamo i nos ta hasi “damage control”, dependiendo di gravedat di e kaso.

“Damage control” ta nifiká ku CTB ta duna e turista un eksperensia positivo pa lag’e purba lubidá esun negativo. Si e situashon ta hopi grave, Polis di Turismo(Politur) ta atendé esaki huntu ku Slachtofferhulp.

E kantidat di turista ku ta bishita Kòrsou ta varia pa aña.

Na aña 2017 nos ta’tin 398.818 turista ku a bishita Kòrsou ku avion i na aña 2016 ta’tin 441.260 turista. Turista nan ku ta bishita Kòrsou ku avion i ku ta pasa mas ku 1 dia na Kòrsou ta ser yama “stayover tourist”.

Turista nan ku ta bishita Kòrsou ku barku krusero ta ser yama turista di krusero.

Na aña 2017 nos ta’tin 634.370 turista di krusero i na aña 2016, nos ta’tin 469.498.

Mayoria di nos turista nan ta bini for di Hulanda. Pues Europa ta e merkado ku ta duna nos mas turista di kual 50% ta Hulandes. Despues ta sigui Nort Amérika ku 20% di totalidat di nos turismo i 15% ta bini di Sur Amérika. Sobra turista nan ta bini for di Karibe, por ehèmpel Aruba i Sürnam.

E temporada haltu di turismo ta di Òktober pa Aprel. Esaki ta e temporada ku mas turista ta bishita Kòrsou.

Mayoria turista nan ta keda den hotèl nan grandi manera entre otro; Renaissance, Hilton, FlorisSuite, Kura Hulanda etc.

Tambe tin turista ta keda den apartamento, resort, bungalow, guest house, bed and breakfast ofserka un famia/konosí.

Mayoria turista gusta bishita nos playa nan, voral playa kenepa grandi. Tambe nan ta gusta bishita parke kristofel, Parke Shete Boka, Watamula etc.

Otro lugá nan ku turista gusta bishita ta Dinah Veeris, Chobolobo, plantashon di aloe.

Turista nan ta gusta hür un outo, baiskel of quad pa nan kore rònt i eksplorá Kòrsou.

Turismo ta e pilar prinsipal di nos ekonomia pa mas ku 10 aña. Nos turismo ta generá entrada pa nos ekonomia por sigui drei di un forma optimal.  Pa motibu ku gobièrnu a mira e importansia den turismo pa ku desaroyo di nos ekonomia,  e gobièrnu di turno den aña 1989 a lanta Ofisina di Turismo di Kòrsou.

Den aña 2017 nos turismo a  generá 858.54 mion i den aña 2016 turismo a generá 849.56 mion.

Aparte di generá entrada pa ekonomia, tambe turismo ta krea kuponan di trabou pa nos komunidat.