Aña Nobo Na Korsou: E Tempu Mas Dushi Di Aña

Aña Nobo Na Korsou: E Tempu Mas Dushi Di Aña

E periodo di fin di aña na Kòrsou ta realmente un temporada maravioso i e maravia ta sigui reina durante e último siman di aña. Na e momento ei tur hende ta prepará pa e aña nobo. E tradishonnan di Bispu di Aña Nobo di Kòrsou ta berdaderamente okurensianan tremendo.    

E periodo di fin di aña ta e periodo di mas dushi na Kòrsou. Tur e yunan di Kòrsou ku a bini bèk ku fakansi pa selebrá Pasku i Aña Nobo ku nan famia i amigunan ta subi kaya, huntu ku e yunan di tera ku ta biba na Kòrsou, pa bai wak tur e shownan di vürwèrk.

For di 27 di desèmber tin shownan di vürwèrk na diferente lugá i e kayanan ta wòrdu será na e lugánan ei ya hendenan por disfrutá di e show. E shownan ta bira un di e hopi gran enkuentronan sosial di e temporada di aña aki kaminda hopi hende ta topa otro. Ora e show kuminsá hendenan di tur edat ta disfrutá di su bunitesa.

For di 27 di desèmber treilernan kaminda nan ta bende vürwèrk tambe ta habri na diferente lugá. Na e treilernan aki esnan ku ta mas ku 12 aña di edat por kumpra vürwèrk. Nan por haña tur sorto di produkto, di klapchinan chikí i (relativamente) sin peliger pa muchu chikí te esnan mas grandi i peligroso pa muchanan di mas edat ku ta dùrf. Naturalmente mayornan ta wak nan yunan masha bon durante e tempu aki.    

Tambe hopi kompania i organisashon ta organisá eventonan di pagara na diferente sitio durante e dia di Bispu di Aña Nobo i durante e dianan promé tambe. E eventonan aki tambe ta bira enkuentronan sosial ya ku hopi hende ta topa i papia tokante akontesimentunan. Despues di e show di pagara tin hopi trabou pa limpia kaya pero el a bira un parti asina integral di e selebrashonnan di fin di aña na Kòrsou ku no por pensa di tin e selebrashonnan aki sin dje.   

Despues di tur esaki ta bini e konteo te bòltumentu di aña durante e anochi di Bispu di Aña Nobo. Esaki ta un kos grandi na tur pais rònt mundu i na Kòrsou ta mesunkos. E selebrashonnan di mas grandi ta tuma lugá den Punda ku Otrobanda, na Brionplein i Emmabrùg. Durante e orario ei nan ta chòk chòk di hende tanten ku bandanan lokal ta toka i famianan ta disfrutá di e muzik i e kuminda i bebida ku nan a trese for di kas.      

I ora e oloshi marka diesdos’or, vürwèrknan ta yena shelu tur kaminda tanten ku e botonan di ponchi ta hasi zonido pa anunsiá kambio di aña. E vürwèrknan ta keda bai laira pa aproksimadamente 40 minüt i e ta realmente un maravia pa mira. Turistanan ku a yega di eksperensi’é a kompar’é ku e eksperensia di ta riba Times Square na New York durante kambio di aña, kual ta un evento ku ta wòrdu siguí rònt mundu.   

Nos ta sumamente bendishoná di por tin e tradishonnan aki na nos isla bunita durante e periodo bunita di aña aki. I nos ta berdaderamente bendishoná di por yama e isla dushi aki nos kas durante henter aña. Felis aña nobo!