E temporada di Pasku a yega na Kòrsou i bo por sinti e ambiente di dianan di fiesta ku ta reina na e isla. Hopi hende ta kumpra palu di Pasku òf pone lus di dekorashon dilanti di nan kas. I awor pueblo henter por disfrutá di e adornonan bunita i festivo ku ta dekorá Alameda ku Brionplein. Definitivamente bo por sinti algu di magia den e aire tur kaminda ku bo bai.    

Pa hopi yu di Kòrsou esaki ademas ta e temporada pa sinti algu di magia den nan stoma tambe. Pasobra e temporada di Pasku na Kòrsou ta un temporada den kual nos por disfrutá di e platonan delisioso ku ta aparesé solamente pa fin di aña. Anto ningun no tin mas demanda ku e ayaka, un masa di maishi yená ku un variedat di sorto di karni òf galiña, rasenchi i oleifi sin pipita, i mará den blachi di banana. Bo ta hañ’é den kasi tur kas na Kòrsou durante dianan di fiesta.  

E plato aki tin hopi nòmber den Karibe i Latino Amérika. Na Venezuela e yama hallaca. Na Santo Domingo e ta konosí komo guanimos. Na Puerto Rico nan ta yam’é pasteles i na Trinidad nan ta yam’é pastelle. Pero na Kòrsou nos konosé simplemente komo ayaka i no tin riba esun di nos. Si e no ta herebiendo den un wea den kushina, bo no por tin e sintimentu di Pasku.   

Asina hopi yu di tera bibá na Hulanda ku no por biaha bai nan dushi isla den e temporada aki tambe ta pensa. P’esei empresanan di catering ayanan ku ta spesialisá den kumindanan di Kòrsou ta haña masha hopi pedido pa ayaka i otro kumindanan di Pasku durante fin di aña. A yega di pasa ku e pedidonan a bira asina tantu ku e empresanan mester a kuminsá rechasá pedido despues di un sierto kantidat sino nan lo no a haña chèns di disfrutá di Pasku ku nan famianan mes.

Pero banda di e ayaka bo ta haña otro kumindanan spesial riba mesa durante fin di aña. Esakinan ta e pekelé (haring salu), sùlt (orea di porko den zür ku peper), ham di Pasku (un otro kuminda masha popular na Kòrsou durante temporada di Pasku) i e Kerstbrood, kual ta pan zut.  

E temporada di Pasku ta un tempu masha dushi mes na Kòrsou i e kuminda di fin di aña ta hunga un ròl hopi importante den e kreashon di e ambiente dushi ei. E ta hasi nos dushi isla mas dushi ainda.