Tania Kross a nase na Kòrsou dia 3 di ougùstùs di aña 1976. For di un edat hóben e tabata sa ku e ke subi podio pero e no tabata sa ainda den kua género e lo ke hasi esei. Eventualmente e konduktor di muzik klásiko Kurasoleño Frank Davelaar a íntrodusi’é na e género di muzik klásiko i for di e momento ei el a keda enkantá kuné. Esaki a habri e kaminda pa e bira e famoso kantante di ópera di mezzo soprano ku e ta awor.

Su promé CD, ‘Corazón’, a gana e premio Edison Music Award i riba e CD aki el a presentá un variedat di kantikanan konosí di kompositornan Kurasoleño manera Emilio Prudencia, René Clemencia i Chin Behilia. Te ainda su mayor proyekto tabata e ópera basá riba e buki di Carel de Haseth tokante e bida di un katibu na Kòrsou titulá “Katibu di Shon’. Esaki tabata e promé ópera na Papiamentu. El a traha komo produktor riba e produkshon aki, mientras ku Carel de Haseth a keda enkargá ku e libreto i Randal Corsen a keda enkargá ku e muzik. El a estrená na Amsterdam na mei di 2013.

Tania a graduá cum laude na e Konservatorio di Utrecht i a risibí su diplomanan di Bachelors ku Masters. For di su tempu na e konservatorio su talento ya tabata sobresalí: durante e tempu ei el a gana diferente konkurso. E premionan aki ta inkluí e premio di promé lugá di Stichting Jong Muziektalent, e Konkurso Internashonal di Arte Vokal Rosa Ponselle na New York i e Konkurso Cristina Deutekom.       

El a hasi su debut internashonal na 2007 ku e Staatsopera Stuttgart na Alemania, kaminda el a interpretá e ròl di Carmen. Esaki tabata e komienso di un karera den kual el a presentá na diferente salanan di konsierto na diferente siudat di renombre internashonal. E lista aki ta inkluí Brussels, Paris, Salzburg, Hannover, Vienna, Athene, Birmingham, Köln i New York. Tambe el a representá Reino Hulandes na e konkurso prestigioso di BBC yama Singer of the World na Cardiff, Wales den Gran Bretania na aña 2003.

Banda di su karera, Tania ta traha tambe pa diferente organisashon na benefisio di hubentut, kultura i edukashon. E ta embahador di Het Leerorkest, pa kual e ta kolektá instrumento tur aña den un kampaña nashonal na Hulanda pa agregá na e kolekshon di instrumentonan ku e organisashon tin.  

Ademas, komo embahador di e Asosiashon Real di Asosiashon di Ópera y Oratorio na Hulanda, e ta hasi esfuerso pa ekstendé e alkanse di muzik klásiko na un públiko mas amplio. Debí na tur su talento i tur su esfuersonan pa preservá i enrikesé e mundu di arte na Hulanda, el a wòrdu nombrá komo miembro di e Akademia di Arte, un organisashon den kual artista na aña 2015. Esaki ta un organisashon hulandes lantá dor di Koninklijke Nederlandse Akademie van Wetenschappen na aña 2014 den kual artistanan prominente den diferente ramo artístiko na Hulanda ta wòrdu nombrá komo miembro.

E aña aki el a partisipá den e programa Beste Zangers, anteriormente konosí komo Beste Zangers van Nederland. E tabata e promé kantante di ópera den e historia di e programa ku a yega di partisipá.

Tania Kross ta un otro ehèmpel di kon leu e talentonan di yunan di Kòrsou por alkansá. Nos ke gradisi’é pa tur lokual el a hasi pa pone Kòrsou den un lus positivo riba nivel internashonal.