Wim Statius Muller (26 di yanüari 1930) ta un kompositor i pianista kurasoleño. Su esfuersonan inkansabel pa konservá e muzik klásiko di Kòrsou a resultá den dos di e honornan di mas haltu ku por otorgá na individuonan ku nashonalidat hulandes, kual ta e título di Kabayero den e Órden di Oranje-Nassau i e honor di un Zilveren Anjer, kual el a risibí personalmente for di man di Reina Beatrix na aña 2012. Esaki ta un honor ku ta wòrdu otorgá na masha poko persona ku a dediká nan mes na kultura den e Reino Hulandes.

Su karera a kuminsá na edat di 65 aña, despues ku el a retirá for di un bida di trabou di diplomasia i kontra-inteligensia. Na e momento ei el a disidí di apliká su konosementu amplio di muzik klásiko di Kòrsou i dediká su mes por kompleto na e kreashon di su propio estilonan romántiko di piano.

Pa motibu di su abilidat birtuoso riba piano, e ta konosí komo e “Chopin di Kòrsou”, en honor di e famoso kompositor i pianista polako Frédéric Chopin.  

Nasí den Otrobanda, Wim Statius Muller a demostrá di tin un talento pa muzik for di un edat yòn. El a haña lès di piano serka Jacobo Palm, nietu di Jan Gerard Palm, kende hopi ta konsiderá komo e fundadó di muzik klásiko di Kòrsou. Asina el a haña un oido pa waltz i e mes a wòrdu hopi influensiá pa e muzik di Frédéric Chopin. Tur esaki a forma su estilo musikal.       

Ku su 19 aña el a muda bai New York pa bai studia muzik na e prestigioso Skol di Muzik di Julliard, na unda el a risibí su diploma di piano i komposishon na edat di 24 aña.  

E siguiente aña Wim a kuminsá duna lès di piano i historia di muzik na e Universidat Estatal di Ohio na Columbus, Ohio, kaminda e tabata hopi popular bou di e studiantenan. Pero despues di sinku aña komo dosente, su destino a tuma un buèlta pekuliar: e gobièrnu hulandes a selekshon’é pa yuda krea un servisio hulandes di kontra-intiligensia kual tabatin su base na Kòrsou den komienso.  

Ku su 42 aña el a muda bai Hulanda pa traha na Binnenlandse Veiligheids Dienst. Desde su puesto einan el a konvertí den un diplomátiko pa e gobièrnu hulandes na NAVO.

Pero asta den su karera largu trahando pa e gobièrnu hulandes, nunka e no a pèrdè su pashon pa toka piano i el a sigui mantené su konosementu ingenioso di e historia di muzik klásiko di Kòrsou i di e otro paisnan den e region di Karibe. Pesei banda di su karera den servisio e tabata duna presentashonnan chikitu de bes en kuando.

Wim Statius Muller a skirbí mas ku 200 komposishon den e géneronan di dansa, wals, mazurka i tumba. E mes a toka hopi di nan pero mayoria a keda sin wòrdu publiká. A pesar ku poko di su trabounan a wòrdu publiká, e ta wòrdu konsiderá un inspirashon pa hopi músiko hóben na Kòrsou.

Na aña 2013 e tabata e tema di un dokumental titulá “Nostalgia: The Music of Wim Statius Muller” (Nostalgia: E Muzik di Wim Statius Muller), realisá pa Alaric Alexander Smeets ku e lema ‘Pianist. Composer. Spy’ (Pianista. Kompositor. Spion).

Nos kera gradisí Wim Statius Muller pa tur e trabou ku el a hasi pa konservá e muzik klásiko di Kòrsou i a la bes pa e aporte ku el a duna na e kultura riku di Kòrsou. E ta un otro ehèmpel ekselente di un yu di Kòrsou ku ta un dushi hende.