Warawara i Trupial – Paranan ku kustumbernan spesial

Warawara i Trupial – Paranan ku kustumbernan spesial

Kòrsou ta un isla masha bunita konsistiendo di hende bunita, playa bunita i naturalesa bunita. Lokual ta destaká den nos naturalesa ta biba entre palu i matanan i eseinan ta e paranan bunita. Tin dos ku a bira parti di Kòrsou su identidat nashonal: e warawara i e trupial.

Photo by Elton Sint Jago

E Warawara
E warawara ta un para solitario i bo ta mir’é prinsipalmente den e área di Bandabou. Bo por haña nan tambe na Aruba, Boneiru, den regionnan den Karibe, den nort di Sur Amérika, den Amérika Sentral i sierto kamindanan den sur di Amérika. Den e regionnan aki e warawara ta konosí komo e caracara di nort na ingles òf e carancho norteño na spañó. E úniko lugánan kaminda e para aki ta wòrdu yamá warawara ta na Kòrsou, Aruba i Boneiru.


E warawara gusta kome prinsipalmente karni di bestianan morto ku ta den deskomposishon, pero e gusta yag riba bestia bibu tambe. Pero pa e yag riba nan e bestianan aki mester ta inmóbil, leshoná, inkapasitá òf chikí. E sa yag riba kolebra, lagadishi, turtuga chikí, piská, kangreu, insekto i paranan chikí (puitu en partikular). E ta un di e poko paranan ku por yag riba su kuminda na pia tambe. Turistanan ku a yega di mir’é na nos isla a deskribí e zonido ku e warawara ta hasi komo un zonido ku nunka nan no a yega di tende di un para i ta difisil pa nan diskribi’é.


E Trupial

Trupial ta un para ku bo ta mira rònt Kòrsou. Nan ta hala bo atenshon spesialmente dor di nan koló briante. Bo por haña e trupial tambe na Aruba, Boneiru, Venezuela, Colombia i Puerto Rico i e ta konosí internashonalmente komo e ‘troupial venezolano’. E ta e para nashonal di Venezuela i e èks Mis Venezuela Internashonal, Edymar Martínez, a bisti un imágen di dje komo su trahe nashonal den e kompetensia di Miss International di 2015 na Tokio, Hapon di kual e a sali e ganadó.


Na Kòrsou tin dos tipo di trupial: e trupial oraño i e trupial kachó (kual bo ta mira den e potrèt ariba). E trupial kachó ta konosí internashonalmente komo Yellow Oriole na ingles i komo e Gonzalito na Aruba. Na Kòrsou el a haña e nòmber trupial kachó debí na e zonido ku e sa hasi, kual parse e zonido di un kachó ku ta wou. Pero e ta un kantante masha kapas ku ta produsí melodianan hopi bunita i alegre.


E nèshi di e trupial kachó (kual bo ta mira den e potrèt ariba) parse un saku di yerba kologá. Su struktura ta mesun kompliká ku un makutu trahá di palu dor di hende anto impreshonante ta ku e trupial ta konstruyé usando su pik i su patanan so. Generalmente e trupial kachó ta usa material natural pa konstruí su nèshi pero den e área entre Willibrordus i Fontein nan a nota ku e trupial a kuminsá konstruyé usando otro material, manera hilu di piska i pida di kabuya sintétiko. E echo ku nan ta usa e materialnan aki pa hasi nan nèshi mas duradero ta algu úniko.

Pues ora bo ta bai Bandabou paga bon tinu anto chèns ta grandi ku bo ta mira un warawara. Pa mira un trupial djis wak den bo kurá i disfrutá di nan kanto bunita. Sigur nan lo rekordá bo kon dushi e isla aki ta.