Kòrsou tin hopi playa bunita. Esnan mihó konosí ta keda na Banda Bou pero na Banda Riba tin kuater playa ku ta destaká ku un enkanto úniko pa pueblo. Esakinan ta Playa Marie Pampoen, Directeursbaai, Caracasbaai i Parasasa Beach.

Playa Marie Pampoen
E playa aki, tambe konosí den boka di pueblo komo Pir, ta situá banda di e hotèl Sunscape na Marie Pampoen. Hopi turista sa bishitá e playa aki pa sambuyá ya ku einan serka tin “Car Pile” (Monton di Outo). Den añanan 60 hopi outo a wòrdu di dùmp pa krea un barera artifisial bou di awa anto esaki a resultá den un di e mihó lugánan pa sambuyá na Kòrsou. Klek riba e siguiente lenk pa haña un bista di dje :

Playa Marie Pampoen ta popular tambe pa lès di landamentu i pa piska (hopi biaha e piskadónan ta bende e piská fresku ku nan a fangu einan mes). Einan tin tambe dos restorant ku ta speshalisá den kuminda di laman.

Directeursbaai
Di e kuater playanan menshoná, Directeursbaai ta e playa mas aislá. Su nòmber tin su rais den e époka den kual e refinería di Kòrsou tabata propiedat di Shell. Durante e tempu ei e direktornan hulandes di Shell so tabata landa na e playa aki. E playa ta situá nèt despues di e edifisio di quarantaine ku ta keda riba e seru serka banda di Baya Beach. E kaminda pa yega no ta bon mantené i no tin bòrchi pa indiká na unda e ta keda (usa Google Maps), pero ora bo yega einan lo bo keda enkantá.

Caracasbaai
Caracasbaai ta un di e bahíanan mas grandi i mas hundu di Kòrsou. E playa aki ta hopi popular pa hasi grel, fiesta di hasiment’i aña i weganan di vòlibòl. E ta un punto di partida pa djòg òf pa hasi kaminata, hasi ehersisio den grupo, òf simplemente pasa un ratu dushi bou di palapa. E playa ta situá mei mei di dos restaurant ku ta sirbi kuminda krioyo sukulento.

Por lo general tin barkunan petrolero ankrá serka banda di e playa pero di un òf otro manera nan ta añadí na su enkanto. E playa ta situá serka di e Fort Beekenburg, kual a wòrdu konstruí na aña 1703 pa protehá e entrada di Spaanse Water. El a sirbi su propósito bon pasobra durante e époka kolonial hopi biaha el a yuda tene forsanan britániko i e piratanan pafó di Kòrsou.   

Parasasa Beach
Meskos ku Caracasbaai, e playa aki tambe ta hopi popular pa hasi grel, fiesta di hasiment’i aña òf simplemente deskansá bou di su hopi palapanan. Ora tin festival di músika, hopi biaha e lugá di parker di e playa ta wòrdu konvertí den ensenario di konsierto.

Banda di Parasasa Beach tin hotèl Marriott ku aktualmente ta wòrdu remodelá. Na momentu ku esaki keda klá e area di Parasasa Beach lo bira aún mas bunita.

Nos a repasá kuater playa di Kòrsou sumamente bunita i ku un ambiente úniko. Bishitánan i eksperenshá kon dushi nos isla ta!