Kasi bo no por menshoná e nòmber Churandy Martina sin smail. E yu di tera ehemplar aki a kaptura nos kurasonnan ku su pianan lihe, su aktitut positivo konstante i su sonrisa kontagioso. Komo koredó el a kompetí den kuater Weganan Olímpiko.

Dos biaha el a sali pa Antiya Hulandes na e Weganan di Atena i despues den e Weganan di Beijing. Despues ku Antiya Hulandes a disolvé na 2010 el a sali dos biaha pa Hulanda na Weganan di Londres i aña pasá den e Weganan di Rio di Janeiro.

Te ainda e tin e motivashon pa sigui tambe, mirando e echo ku el a deklará ku e tin plan pa kompetí den e Weganan Olímpiko di 2020 na Tokyo.    

Nasí komo Churandy Thomas Martina dia 3 di yüli di aña 1984 na Kòrsou, Churandy a gana su promé medaya di kore ora e tabatin 6 aña den un kareda hubenil. Durante su karera ilustre, el a mantené su gustu i gestonan krioyo. Un bon ehèmpel di esaki ta su plato faborito, kual ta tutu ku piská i banana hasá.   

En realidat bo no por yama e karera di Churandy Martina ilustre so. Kuminsando na aña 1999, el a gana hopi medaya i establesé hopi rèkòrt. E úniko dekorashon ku falta na su garganta ta un medaya olímpiko, kual el a hera di gana na mas ku un okashon. El a realisá tur e logronan aki ku su aktitut optimista intakto.

E ta konta ku hopi logro maestral. Entre nan ta: e tin den su poseshon e rèkòrt di korementu hulandes riba 60 meter, 100 meter, 200 meter i e estafeta di 4×100 meter. Tambe e tin e rèkòrt mundial riba 30 meter, kual el a logra dor di kore mas lihé ku un sèt di dominó ku tabata kayendo (esaki lo pon’é den Buki di Rèkòrt di Guinness). Ademas e tin tur e rèkòrtnan di korementu di Antiya Hulandes riba su nòmber.    

Churandy a gana tambe un total di 10 medaya di oro den e Weganan Panamerikano, e Weganan di Sentro Amerika i Karibe, e Weganan Suramerikano, e Kampionato Panamerikano Hubenil i e Kampionato Europeo. Banda di esaki el a gana un total di 5 medaya di plata tambe den e Weganan Suramerikano, e Weganan di CARIFTA pa Hóbennan bou di 17 aña, e Weganan di CARIFTA pa Hóbennan bou di 20 aña i e Kopa Kontinental.   

Ademas di tur e logronan aki, Churandy Martina ta e úniko koredó banda di Usain Bolt ku a aparesé den e final di 200 meter den e Weganan Olímpiko di Beijing na 2008, e Weganan Olímpiko di Londres na 2012 i e Weganan Olímpiko di Rio de Janeiro. Den e Weganan di Rio de Janeiro ta nèt un sentésimo di sekònde a separ’é for di un medaya di bròns.  

Den tur kos Churandy Martina a keda humilde i el a mantené su enfoke riba e mehorashon konstante di su markanan personal. Su étika di trabou i su aktitut positivo sigur ta hasi’é un modelo pa su yu muhé i tur e hóbennan di Kòrsou. Nos no por warda pa mira kiko mas e ta bai logra!