Siman pasá e yu di Kòrsou di mas famoso na Hulanda, Jandino Asporaat, a enkabesá un delegashon di yunan di tera ku tin hopi influensia na Hulanda ora nan a bai bishitá e minister plenipotensiario Anthony Begina na Curaçaohuis na Den Haag.

Nan a dialogá tokante e posibilidatnan pa motivá mas yu di tera pa sobresalí i e formanan den kual por krea un imágen mas positivo di nos hendenan tantu den e media na Hulanda komo ku e media na Kòrsou.  

Den e delegashon di yunan di tera influyente tabatin Kenneth Asporaat, Archell Thompson i Paddy Roomer. Esakinan ta individuonan ku a duna aporte ekstenso na esfuersonan pa pone Kòrsou den un lus mas positivo durante e último añanan aki.

Un bon ehèmpel ku nan por usa di un yu di Kòrsou ehemplar na Hulanda ta e ehèmpel di Bob Pinedo. E ta un onkólogo ku fama mundial ku a gana hopi premio i a logra hopi riba tereno di tratamentu di kanser na Hulanda. E ta un Kabayero den e Órden di Leon Hulandes, un di e órdennan sivil mas antiguo i mas altu na Hulanda ku ta data for di aña 1815, i e ta un Komandante den e Órden di Oranje-Nassau.     

Nasí komo Herbert Michael (Bob) Pinedo na Kòrsou dia 25 di ougùstùs di 1943, Bob Pinedo a krese den un famia hudiu sefardí tradishonal. E tin bon rekuerdo di su hubentut na kas di famia na Zuurzak, kaminda e tabata hunga weganan di mucha ku su amigunan. El a muda bai Hulanda ku 16 aña pa bai studia medisina na Delft i Leiden.

Inisialmente su herensia hudiu karibense a hasi’é difísil pa e adaptá su mes na e bida na Hulanda, kaminda sintimientunan antisemita tabata biba ainda serka e hulandesnan ku e tabata topa. Pero el a perseverá i el a optené su título di médiko na Rijksuniversiteit Leiden.     

Na 1972 el a skirbi su tésis tokante hipertenshon renovaskular. Poko despues, ora e tabata hefe di e klínika na Academisch Ziekenhuis Utrecht, el a ripara ku e manera di hasi sirurgia pa kombatí kanser tabata muchu impersonal.     

Den e époka ei na Hulanda kanser tabata wòrdu konsiderá un sentensia di morto enbes di un enfermedat ku por trata. Bob Pinedo a trese un kambio profundo den e pensamentu ei por medio di su enfoke humano pa ku e tratamentu, den kual el a ahustá e esfuersonan médiko pa trata e enfermedat a base di lokual e pashènt ta bis’é.   

Un di e hazañanan di su karera médiko a sosodé ora el a funda e VUmc Cancer Center Amsterdam (CCA), kaminda ta trata pashèntnan di kanser. Aparte di su inteligensia supremo komo onkólogo, Bob Pinedo tabata un eksperto den rekoudamentu di fondo i asina el a logra haña finansiamentu pa CCA di empresanan privá. Awor e sentro aki ta para komo un testimonio na su legado. Durante hopi aña e tabata profesor di medisina tambe na e universidat di VU na Amsterdam.      

Manera ya a menshoná, Bob Pinedo a gana hopi premio pa su trabou durante su karera. Un di e premionan di mas importante ku el a gana tabata e premio di Spinoza na aña 1997, kual el a gana pa su investigashonnan den onkologia. Esaki ta e honor di mas distinguí di Hulanda riba tereno di siensia. E ta wòrdu brindá na individuonan ku a realisá logronan riba nan tereno di investigashon sientífiko.

Un otro premio importante ku el a haña tabata e premio di David A. Karnofsky Memorial Award di e Sosiedat Merikano di Onkologia Klinikal na aña 2014. E tabata e di tres estranhero ku a wòrdu honrá ku e premio merikano aki i pa e motibu aki el a asta haña un karta di felisitashon di e promé minister di Hulanda, Mark Rutte.    

Banda di e logronan aki e ta miembro tambe di e Sosiedat Real di Medisina (Royal Society of Medicine) i e Akademia Real di Siensia di Hulanda (Koninklijke Nederlandse Akademie van Wetenschappen).

Aktualmente e ta biba na Kòrsou seis luna pa aña i e ta kasá ku dos yu muhé, un di kual tambe ta traha den e tereno di medisina. Bob Pinedo a krea Fundashon Prevenshon tambe aki na Kòrsou pa yuda den e lucha kontra kanser di pechu.

Nos debe e gran yu di tera aki un realse haltu pa tur su logronan eksepshonal. E ta un ehèmpel ekselente di e grandesa di dushi Kòrsou i su dushi hendenan.