Enith Brigitha ta un èks-landadó Kurasoleño ku a kompetí pa Hulanda den e weganan olímpiko di aña 1972 i aña 1976, kaminda el a gana diferente medaya. Esaki a hasi’é e promé landadó di koló ku a gana medaya olímpiko den landamentu. 

Na sèptèmber di aña 2017 a sali un buki tokante su karera internashonal titulá ‘Enith Brigitha. Zwemmen in de schaduw van doping (Enith Brigitha. Landando den sombra di dopahe)’, skirbí pa Jeannette van Ditzhuijzen. Aktualmente e ta na Kòrsou promoviendo su buki. El a entregá un ehemplar na minister Marylin Alcalá-Wallé i for di 4’or di atardi riba djárason dia 18 di òktober e tabata na Samson Boekhandel na Fokkerweg pa firma buki. Tambe lo e tei na Bruna na Zuikertuin Mall for di 11’or djasabra dia 21 di òktober.  

Enith Brigitha, nasí ku e nòmber Enith Sijtje Maria Brigitha na Kòrsou dia 15 di aprel di aña 1955, a siña landa den laman i ta den laman su karera a kuminsá tambe. Ku su 13 aña el a gana un kareda di landamentu di 2,5 kilometer na Spaanse Water. El a gana e kareda aki tres aña konsekutivo. Entre e añanan 1967 i 1970 el a gana dos medaya di oro i dos medaya di plata pa Antia Hulandes na weganan di reino.

Ku su 15 aña el a muda bai Amsterdam huntu ku su mama i su kuater ruman hòmbernan. Einan el a traha komo benededó den un pakus banda di su aktividatnan komo landadó. E tabata landa den e klup di landamentu yamá ‘Het Y’.

Na aña 1972 el a bira e promé landadó hulandes ku a landa e estilo liber (vrije slag) di 100 meter den ménos ku un minüt. Di aña 1972 pa aña 1979 e tabata e mihó landadó di Hulanda. Ademas e no tabata landa den estilo liber so, e tabata sobresalí tambe den estilo di lomba (rugslag), estilo di barbulètè (vlinderslag) i estilo di kambio di estilo (wisselslag). En total el a konkistá 21 título nashonal den landamentu na Hulanda.  

Manera ya ta konosí, Enith a sobresalí riba esena internashonal tambe. Den e Kampeonato Mundial di landamentu di e añanan 1973 i 1975, el a yuda e tim di Hulanda gana un medaya di plata i kuater medaya di bròns. Adishonalmente el a representá Hulanda na e weganan olímpiko di aña 1972 na München, Alemenia i esnan di aña 1976 na Montreal, Canada. El a gana medaya di bròns den estilo liber (vrije slag) di 100 meter i 200 meter.

Na e weganan olímpiko di aña 1976, el a kaba tras di dos landadó di Alemania Oriental den landamentu. Despues na aña 1990 a sali na kla ku e pais aki tabata partisipá den dopahe sistemátiko di su atletanan (inkluso esnan ku a gana oro ku plata den e estilonan ku Enith Brigitha a landa) den un multitut di torneo i kampeonatonan den añanan ‘70.

Komo resultado di e revelashon aki, hopi atleta a demanda pa Enith Brigitha risibí e oro ku e tabata meresé den estilo liber di 100 meter i e plata ku e tabata meresé den estilo liber di 200 meter. Lamentablemente esaki no a sosodé.

Pero apesar di e kontroversia di e dopahe di e Alemannan Oriental, Enith Brigitha por ta orguyoso di un karera sumamente eksitoso den kual el a keda nombrá komo Deportista Hulandes Di Aña dos biaha na añanan 1973 i 1974. Na aña 1979 el a risibí e dekorashon haltu di Ridder in de Orde van Oranje-Nassau, un titulo reservá pa esnan den Reino ku a logra distinguí nan mes.

Kòrsou tampoko no por a keda sin honrá Enith pa su logronan i asina den aprel di aña 2017 a duna e pisina na SDK e nòmber: pisina Enith Brigitha. Deportistanan yu di tera ku a presta asina tantu den nan karera ta un di e hopi motibunan pa nos ta konsiente di kon orguyoso nos por ta di nos pais Kòrsou. Pesei nos kier a yama danki na Enith Brigitha pa tur lokual el a hasi pa alsa Kòrsou su nòmber riba esena internashonal.

Masha danki!