Festival di tumba – Su orígen i su ambiente

Festival di tumba – Su orígen i su ambiente

Aña a habri i Kòrsou ta prepará pa un otro temporada di ambiente: Karnaval. Un temporada di hopi festividat entre otro; ‘jump-up’, ‘jump-in’ i paradanan manera Karnaval di Mucha, Parada di Tiner, Karnaval di Bándabou, Gran Marcha pa despues kulminá den e Marcha di despedida. Tur esaki kompañá pa e dushi ritmo di Tumba di Karnaval ku ta wòrdu skohé durante e Festival di Tumba.

E kompetensia musikal di kuater dia aki, a para bira un gran fenómeno kultural i turístiko na Kòrsou. Kiko ta su orígen?

Tumba ta un tipo di músika skibí den 2/4 mat ku ta wòrdu toká na Aruba, Boneiru y Kòrsou. Tumba por wòrdu konsiderá komo e músika mas original di e islanan ABC. Sinembargo e orígen di tumba ta klaramente afrikano. E nòmber tumba ta originá for di un tribu yamá Bantú, di Kongo, Afrika. Ántes tabatin hopi tumba instrumental komponé entre otro pa Gerry Palm, Rudolf Palm i Janchi Boskaljon. Mas despues, Rignald Recordino di Doble R a bira un leyenda pa su komposishonnan moderno.

Hopi yu di Kòrsou ta kere ku semper ta tumba a wòrdu toká den temporada di karnaval, pero esei no ta e kaso. Promé ku añanan setenta, poblashon di Kòrsou tabata toka Kalipso den e temporada aki. Esaki debí na influensia dje imigrantenan di islanan ariba ku a bini pa traha na Shell.  

Na aña 1971 un kambio grandi a tuma lugá riba e área aki. Músikonan lokal tabata deseá pa inisiá kreashon di nos propio músika lokal pa karnaval. Despues di hopi petishon, e promé Festival di Tumba a tuma lugá den Teatro Roxy, na Pietermaai. Aki Anselmo “Boy” Dap  ku ta wòrdu konsiderá komo e “Tata di Tumba” a gana su promé tumba.

Segun añanan a pasa a kambia lokalidat di selebrashon di e festival vários bia, entre otro den stadion di SUBT, promé ku yega na Festival Center (Brievengat) den añanan nobenta. Te ku dia di awe nos konosé Festival Center komo e paraiso di tumba.

Koronashon di nòmbernan grandi a tuma lugá den Festival Center durante di Festival di Tumba. Artistanan ku a marka historia den tumba ta Elia Isenia komo e promé hende muhé ku a sali reina di tumba, Boy Dap ku a sali Rei di Tumba na dies diferente okashon i Farley Lourens komo e úniko ganadó ku a gana tumba tres aña konsekutivo.

E dushi músika i festividatnan den e temporada di Karnaval na Kòrsou, ta hasi nos isla unu mas dushi. Gosa un bòl durante di temporada di karnaval!