Kenley Jansen: Hasiendo Kosnan Grandi Den Grandes Ligas

Kenley Jansen: Hasiendo Kosnan Grandi Den Grandes Ligas

Kenley Jansen ta un pelotero Kurasoleño profeshonal den Grandes Ligas (MLB) na Merka pa Los Angeles Dodgers. El a hunga un ròl klave den e viktorianan ku a hiba Dodgers te na e Serie Mundial aktual. Nan a wòrdu yudá en gran parti pa su prestashonnan durante e temporada di beisbòl aki, den kual el a wòrdu selektá pa bai All-Star Game pa di dos biaha i den kual el a alkansá e logro históriko di a kibra e rèkòrt di Adam Wainwright pa mas ponche den un temporada sin rende kaminata.

Nasí komo Kenley Geronimo Jansen na Kòrsou (30 di sèptèmber di 1987), Jansen a nase den un famia atlétiko. Su tata, Isidor Jansen, tabata un hungadó di futbòl konosí i su mama, Bernadette Jansen, tabata un hungadó di futbòl i vòlibòl eksepshonal. Su dos ruman hòmbernan mayó Verney i Ardley tambe a haña e don atlétiko aki mirando e echo ku nan tambe tabata hunga beisbòl.

Kenley Jansen ta un di e hopi streanan Kurasoleño den Grandes Ligas ku a yega di trein na Shon Ki Nicasia Ballpark, e stadion di beisbòl legendario na Marchena. E stadion a haña nòmber aki pa duna honor na e entrenadó ku a trein hopi generashon di pelotero einan pa kuater dékada. Otro streanan di Grandes Ligas ku tambe a yega di trein einan ta Didi Gregorius i Andrelton Simmons. Nan tambe ta peloteronan Kurasoleño ku ta logrando kosnan grandi den Grandes Ligas: Didi Gregorius a kibra e rèkòrt di hónrun di Derek Jeter i Andrelton Simmons a gana e premio di Wanta di Oro ya dos biaha kaba.

Jansen su karera di beisbòl a kuminsá na 2004 ora el a bira un hungadó den Ligas Menores na Merka. Hopi hende no sa ku el a kuminsá su karera komo reseptor (catcher) i e gerensha di Dodgers no a ripara su movementu i su dominio di su brasa di tira te ora el a tira pa Hulanda den e Klásiko Mundial di Beisbòl na 2009. Den e torneo ei Jansen a yuda e ekipo hulandes gana e ekipo di Repúblika Dominikana, un pais ku hopi a spera lo gana e torneo. Despues di e Klásiko e gerensha di Dodgers a kuminsá trein su brasa i asina nan a konverti’é den un pelotero di kaliber di All-Star. Eventualmente el a hasi su debut den Grandes Ligas na 2010.     

Jansen a deklará públikamente ku e stima su pais i el a demostrá esei den su akshonnan; hopi ekipo hubenil di beisbòl na Kòrsou ta hunga ku pèchi, unifòrm, bate, wante òf bala di beisbòl ku el a manda for di Merka òf paga p’e for di su propio kuenta.  

E ta kasá ku Gianni Jansen i nan tin dos yu huntu, un yu muhé di 4 aña i un yu hòmber di 2 aña. Nan ta biba na Merka na Redondo Beach, California.

Kenley Jansen su talento ekstraordinario a yama e atenshon di periodistanan di revistanan merikano konosí manera Los Angeles Times, The Washington Post i Newsday. Algun di e periodistanan a asta bini Kòrsou pa investigá su historia. Ademas, aktualmente su salario ta hasi’é e atleta di nashonalidat hulandes mihó pagá.  

Nos kera gradisí Kenley Jansen pa e aportashon di su hazañanan na Kòrsou su reputashon komo e fábrika mas grandi na mundu di talento di beisbòl i nos ta dese’é tur klase di éksito den e sobrá weganan di e Serie Mundial aktual.

Kenley ta un otro motibu pa yama Kòrsou un dushi isla!