Dia 4 di desèmber próksimo Willemstad lo bai selebrá su di binti aniversario komo un sitio nombrá pa UNESCO komo Patrimonio di Humanidat Mundial. Danki na su 750 edifisionan protehá situá den su kuater distritonan kolonial den su sentro di siudat – kual ta Punda, Otrobanda, Scharloo i Pietermaai Smal – Willemstad ta un di e siudatnan di mas mihó konservá den Karibe.

Pa e motibu aki e di tres “Caribbean Conference of National Trusts and Preservation Societies(Konferensia Karibense di Trùst Nashonal i Sosiedatnan di Preservashon)” lo wòrdu tené den Willemstad. E konferensia lo wòrdu organisá dor di Curaçao Heritage Platform (Plataforma di Patrimonio di Kòrsou) i e lo tuma lugá di dia 16 di novèmber te ku dia 19 di novèmber.  

E konferensia aki lo reuní profeshonalnan di tur ramo ku tin di aber ku patrimonio, konservashon i trùstnan nashonal. Tambe e lo konta ku oradornan (keynote speakers) i konferensistanan (lecturers) di henter Karibe.   

Na e momentonan aki e sentro di Willemstad ta eksperensiando un époka bunita di evolushon. Bo ta mira esaki den e arte ku artistanan ta pinta riba e murayanan di Skalo Abou, e rekoridonan na pia ku ta wòrdu organisá den Punda, Otrobanda i Skalo, e merkado semanal yamá Punda Thursday Vibes ku ta tuma lugá tur djaweps anochi den Punda, i e restourashon di e edifisionan den Pietermaai Smal.   

Pero e desaroyonan aki no a wòrdu realisá di un dia pa otro. Durante hopi dékada e edifisionan den e kuater distritonan kolonial tabata den mal kondishon, i mas ainda despues di tur e susesonan di Trinta di Mei. Pero e edifisionan a kuminsá wòrdu restourá den añanan 80 danki na fondonan gubernamental di Hulanda i proyektonan privá di fundashonnan lokal di preservashon di monumento. Dia e fecha di 4 di desèmber di 1997 a yega, e dia ku Willemstad a wòrdu nombrá pa UNESCO komo Patrimonio di Humanidat Mundial, ya mayoria di e edifisionan a wòrdu restourá.  

Banda di esaki Willemstad tin hopi distinshon pa ta orguyoso di dje. Entre e distinshonnan aki ta e.o. Emmabrùg, e úniko brùg na mundu ku ta di palu i ku ta flota, Julianabrùg, e brùg di mas haltu den Karibe, e sinagoga Mikvé Israel – Emanuel, e sinagoga di mas bieu den hemisferio oksidental ku ta wòrdu usá ainda, i e sementerio Beth Haim Blenheim, e sementerio hudiu di mas bieu den hemisferio oksidental.     

Ademas e arkitektura kolonial di e edifisionan den sentro di Willemstad tabata un gran motibu dikon e wèpsait Cruise Critics, e foro di kruseronan riba internèt di mas grandi na mundu, a otorgá Kòrsou e premio “Cruiser’s Choice Destination Award of the Southern Caribbean” na yüli di 2017. Esaki ta nifiká ku Kòrsou a wòrdu konsiderá e mihó destinashon pa kruseronan den sur di Karibe den e temporada di krusero di 2016 bai 2017. Pues Kòrsou a haña hopi apresio di e turistanan di krusero ku a bin bishitá nos isla i hopi di nan tabata papia masha positivo di e bunitesa di e edifisionan den nos kapital.    

Esaki ta un otro motibu pa ta orguyoso di nos dushi Kòrsou.